Сайн байна уу, Миний хөөрхөн найз. Арав гаран жил найзлаж, нөхөрлөж, амьдралын баяр баясгалан, уйтгар гунигт мөч бүрээ хамтдаа сэтгэл догдлон хуваалцдаг хонгор найз, эрхэм хүндэт чи минь ээ. Энэ олон жил өвөр түрийдээ орон нөхөрлөж, өөрөөсөө тасалчихсан юм шиг мэддэг болжээ бид биесээ. Чамдаа нэг ч удаа захидал бичиж байгаагүйгээ сая л анзаарлаа. Өөрийн гараар нямбайлан бичиж, цэвэр дугтуйнд хийгээд, дөрвөн марк нааж, "Алс хол суугаа НАЙЗ чамдаа" гэж хаяглаад, цагаан далавчит төмөр хөлөг хөлөглүүлэн чамдаа илгээх учиртай юмсан. Тэр үе бидний цаашдийн хамтдаа туулах олон олон он жилүүдийн хаа нэгтээ ирнэ гэдэгт найз нь итгэж байна. Харин одоо энэ өөрийн гэсэн бяцхан цахим дэвтэртээ найз чамдаа хэлэх зүрхний хэдэн үгээ чадан ядан товшиж сууна. Амьдралын минь бүхий л чухал мөчүүдэд та 2 минь надтай хамт байж дээ. Зовох цагт нөхрийн чанар танигдана гэдэг зүйр үг байдаг. Нөхрийн чанарыг таньж, хүн харыг зугтаж, уравтал нь зовлон зүдгүүрийг одоохондоо туулаагүй ч, магад цаашид тийм зүйл болвол та 2 минь дэргэдээс алхам ч холдохгүй гэдгийг би мэддэг. Гэвч биднийг тэр зовлон нь тойроод гарнаа, тиймүү? Чи санаж байна уу? Чамайг сургуулийн хана налуулж, зогсоогоод, цээжин дээр чинь дарж ухаан алдуулж байсныг. Чиний зүрх өвддөг гэдгийг мэдэлгүй, сургуулийн эмчийн өрөөнд бүлтэгнэж зогсож байснаа би тод санаж байна. Ангийн хүүхдүүд пирожки, ороомог, ундааныхаа мөнгийг цуглуулж 3-р хороололын сургуулиасаа 15-р хороолол дахь гэр хүртэл чамайг эсэн мэнд хүргэж өгөх үүргийг хүлээхдээ би сургуулийн гадаа чиний толгойг өвөр дээрээ тавьчихаад нүүрэн дээр чинь нулимсаа дуслуулж суусныг. Тэгэхэд тэр хүү л ганцаараа бусдаас ихийг бүр 500-тын дэвсгэрт таксиныхаа мөнгөнд нэмэрлэ гэж өгснийг... Тэр нь бяцхан зүрхэнд нь багтаж ядсан дурлалынх нь илэрхийлэл байсныг санаж байгаа биз дээ. Одоо тэр хүү томоо эр, хүүгийн аав болсон. Биднийг машинд суухад ангийн багш маань за гайгүй ээ та нарыг гээд үлдсэн дээ. Тэгэхэд үлдсэн хэд маань гайгүй сайн гөвшүүлсэн биз. Харин бид танай гэрт очоод, түрүүхэн ухаан балартаж унаад, нэгнээ алах шахсанаа мартчихаад, чиний дуртай боёзоонь-ийн дууг хамгийн чанга дээр нь тавиад, танайд байнга л уут дүүрэн байдаг аскорбиний хүчлийг хордлого тустлаа идэнгээ орон дээр чинь үсэрч тоглож байсныг... Удалгүй уйдчихаад -Чамайг дахиад ухаан алдуулж үзье гэж би хэлээд нөгөө аюултайгаа дахин хийснийг чи санаж байна уу? Бид тийм л гэнэн тэнэгүүд байж. Одоо ч тэр хэвээрээ. Гэмгүй сайхан нөхөрлөл. Пеонерийн зусланд хоёулан шиг нь хөөрхөн охидууд байгаагүйг өрөөний үүдэнд зарим нь саяхан зовж байж түүсэн, шинэхэн давирхаатай самар өгөхөөр, зарим нь бид 2-ын ам хамар, гар хурууг давирхай болгохгүй гэж цөмж өгөхөөр овоорон зогсох үеийн хөвгүүд гэрчилнэ тиймээ? Шөнө унтахдаа ангийн хоёр хүүг хамгаалагчаар аваад унтана. Тэгэхгүй бол харанхуй шөнө өнөө хэд орж ирчихээд шивэр авир гээд унтуулахгүй. Харин мөөжий бид 2-ыг пеонерийн зуслан явахад бид хоёр хамгийн том толгойтой амрагчид байв. Хагас цэрэгжилтийн зусланд бид хоёр шиг үд болтол унтаж, өглөөний цайгаа өрөөндөө зөөлгөдөг хоёр танхай байсангүй. Өөр бүлгийн хөвгүүдтэй танилцъя гээд ирэхэд нь зөвшөөрсөн бид хоёрыг харчихаад эр юмтай ангалзаад ичдэггүй юм уу гэж хоёуланг нь явахад хамгаалж байсан ангийн 2 хүүдээ загнуулаад, гомдоочихсон. Бид 2-той яван явтлаа дугараагүй. Одоо тэр хоёр маань мундаг том эрс. Эхнэр аваач гэж үглүүлээд л байж байна. Санаанд таарсан нь олдохгүй л гэнэ. Санаа муутай юм байна л гэнэ. Ямар сайндаа хоор хоорондоо суухуу гээд тоглож байх вэ. Харин саяхнаас нэг бэрийн сураг сонсогдоод л байгааг мэдсэн биз дээ найзаа. Дөнгөж ажилд ороод удаагүй 18-хан настай би гэдэг хүн өвдчихөөд, саяхан авсан цалин дуусчихсан. Гэрээ чадан ядан авч явдаг найз нь хөөрхий ээждээ өвдсөн гэж хэлж мөнгө асууж сэтгэлийг нь хямраахгүй гэж бодож байхад та хоёр миний бодлыг уншчихаад нэг нь ээжийнхээ бөгжийг ломбарданд тавьж намайг эмчлүүлээд, нөгөө нь харь холоос мөнгө явуулж бөгжийг нь авч байж билээ. Тэгэж л бие биесээ хайрладаг бид. Та хоёр миний эрхэм хүмүүс минь юм шүү. Архи уусан гэж ээждээ загнуулахаар явахдаа ганцаараа загнуулахаас айгаад намайг дагуулж явахад чинь би гомдож уурлаагүй, харин ч баярласан. Би чиний хувьд тийм дотно гэдгээ мэдэрсэн. Энийг чамд хэлээгүй ээ. Оройтож орчихоод аавдаа зодуулсан гэж хэлэхэд чинь би та хоёрт битүүхэн атаархадаг байсан. Надад зодох битгий хэл ширүүхэн үг хэлэх аав байхгүй. Ижий минь надад ганц ширүүн үг хэлэхгүй. Дуугаа хураачихна. Тэр нь надад там шиг санагддаг байсан сан. Ингэж байхаар үглээд загнаад зодчихвол гээд л... Одоо муу ээж минь нас жаахан яваад үглэж янших гээд байдаг болж. Тиймээс бид гурвын хамгийн омголон толгой томтой нь би. Намайг найз чи минь дандаа хэтэрхий бардам байж болохгүй. Хааяа ч гэсэн бусдыг бод, өөрийнхөөрөө зөрүүдлэхээ боль, юм гэдэг чинь үргэлж нэг янзаараа байхгүй гэж захидаг. Харин мулгуу найз нь одоо ч хэвээрээ. Хамгийн зарчимч юманд ул суурьтай ханддаг биеэ даасан нь Мөөжий. Айлын ганц болохоор ээж аав нь хэдийгээр залуу хүмүүс ч гэсэн чи цор ганцаараа шүү, чи өөрөө л юмаа хийнэ, чи л ухаантайхан шиг байхгүй бол хэн ч чамайг гэхгүй гэдэг үзээр хүмүүжүүлчихсэн болохоор тэр хэрээрээ хэрсүү, эрх биш. Харин хамгийн ухаантай, сэтгэн болох чадвартай, дүн шинжилгээ хийх мэргэжилтэн, сэргэлэн нь дэндсэн хүн нь чи шүү дээ. Хоёр найз нь дандаа ч чамаараа бахархаж явдаг. Мөн тэр хэрээрээ ярьдаг юм. Миний хөөрхөн найз магтуулах тун дуртай хүн дээ тиймээ. Гэхдээ энэ бол магтаал биш юм шүү анд минь. Чамд минь ангийн бүх банди нар хайртай, чи тэд нарын анхны хайр гэж одоо ч онгирох дуртай. Харин би тэгэхэд ч, одоо ч чамаас нэг юм нууж явсан нь: Би Ирагаас хөөрхөн байхад яагаад хөвгүүд Ирад татагдаад байдаг юм бол гэдэг бодол. Одоо ч залуус та хоёрт надаас илүү татагдахад би нөгөөх л 10 жилийн өмнөх асуултаа өөрөөсөө асуусан хэвээр. Миний хоёр найз тийм л гадаад төдийгүй дотоод сэтгэлийн үзэсгэлэнтэй, тэр нь та хоёрыг минь гийгүүлж явдаг. Би та хоёртоо хайртай. Одоо бид өсвөр насны охид байхаа хэдийн больсон. Ганц шил дарс хувааж уучихаад нэг нь нулимас цийлэгнүүлэхэд дагаад уйлдаг болчихож тиймээ. Зовлон зүтгүүртэйдээ биш харин хэн хэн маань амьдралын даваа бүдчээ болгонд бүдэрчихгүй юмсан гэж тэмцэхдээ нэг ч удаа хэцүү хатуу гэлтгүй шүд зуун тэвччихээд биесээ хараад тэсгэлгүй уярсан нь тэр гэдгийг би мэднээ. Найз гэдэг чинь ямар учиртай үг болохыг та хоёрыг харах болгондоо л улам ихээр ухамсарлан ойлгодог юм шүү. Хатууг минь зөөллөдөг, хамтдаа баярладаг бид гурвын гар гараасаа хөтлөлцөөд инээмсэглэн, элдвийг хүүрнэлдэн алхах гэрэлт зам уртаас урт байгааг би харж байна. Хамгийн хэрэгтэй үед нь дэргэд чинь байж чадахгүй байгаад найзыгаа уучлаарай. Гэвч хоёр найз нь сэтгэл зүрхээрээ үргэлж чамтай хамт гэдгийг марталгүй санаж яваарай !!! Чамайгаа чанга тэврэн үнсье.
О.Номингоогоос анд найз Э.Энхчимэгт
2010.11.02
Бичсэн: namka
Бичсэн: 
Бичсэн: 
Бичсэн: 
Бичсэн: 